വിചിത്ര മനുഷ്യന്‍

സമർപ്പണം: പുസ്തകങ്ങളുടെയും മരങ്ങളുടെയും നന്മയും തണുപ്പും അന്യമായ തലമുറയ്ക്ക്...

വിചിത്ര മനുഷ്യൻ

അകലെയേതോ നാട്ടിൽ ഒരു വിചിത്ര മനുഷ്യനെ കണ്ടെത്തിയത്രേ!!

ഒരു കട്ടിക്കണ്ണടയും വെച്ച്, ചെറിയ ലാപ്ടോപ് പോലെ തുറക്കാവുന്ന പുറംചട്ടയുള്ള ഒരു സാധനത്തിൽ, താളുകളെന്നോ മറ്റോ പറയണ എന്തോ ഒന്ന് മറിച്ച് നോക്കി​ക്കൊണ്ട് (അതിനെ അയാൾ "പുസ്തകം" എന്നാണത്രേ വിളിക്യ!) മരച്ചോട്ടില്‍ (അവിടെ എവിടെയോ ഒറ്റയ്ക്ക് നിക്കണ ഒരു മരമുണ്ടത്രേ!) വെറും നിലത്ത് അങ്ങനെ ഇരിക്യാത്രേ അയാള്‍. വെറും നിലത്തൊക്കെ എങ്ങനാപ്പോ ഇരിക്കണേ?? അതും മണ്ണിലേ.... നോവില്ല്യെ ആവോ... ആ മരം അയാള്‍ക്ക് "തണല്‍" കൊടുക്കുന്നുണ്ട് പോലും! എന്താപ്പോ ഈ "തണല്‍" എന്ന് വെച്ചാ? മമ്മിയോട് ചോദിച്ചപ്പോ തണുപ്പ്, നിഴല്‍ എന്നൊക്കെ പറേണു... തണുപ്പോ?? ന്‍റെ റൂമിലെ ഏസിയെക്കാള്‍ തണുപ്പുണ്ടാവുമോ ഇപ്പറഞ്ഞ തണലിന്??? ഒന്നിരുന്ന്‍ നോക്കാംന്നു കരുതിയാ ഇവിടെവിടെയാ അപ്പറഞ്ഞ പോലൊരു മരം??!!!

എന്നാലും അയാള്‍ കുനിഞ്ഞു നോക്കിയിരിക്കണ "പുസ്തകം" എന്ന് പറേണ ആ സാധനത്തിലെന്താവും ഉള്ളത്?? ഡാഡി പറഞ്ഞത് അക്ഷരങ്ങളാണെന്ന്... ന്‍റെ ടാബിലും ഉണ്ടല്ലോ അക്ഷരങ്ങള്‍... പിന്നെന്തിനാണാവോ ഈ "താളുകള്‍!" പിന്നെയാ കട്ടിക്കണ്ണട...ഒരു പഴയ ഫോട്ടോയില്‍ മുത്തശ്ശനെന്നു പറയണ ഒരാള്‍ വെച്ച് കണ്ടിട്ടുണ്ട് അത്... കാഴ്ചയ്ക്ക് പ്രശ്നൊള്ളോരാ വെക്കണേന്നാ കേട്ടത്... അതിനല്ലേപ്പോ ലെന്‍സൊള്ളത്... ഞാനും വെച്ചിട്ടുണ്ടല്ലോ... പിന്നെന്തിനാ അയാളിപ്പഴും കണ്ണട വെക്കണേ?? ലെന്‍സ്‌ കൊണ്ട് കണ്ടാല്‍ വ്യക്തത പോരാന്നു തോന്നീട്ടാവുമോ?? ശരിക്കും ഒരു വിചിത്ര മനുഷ്യന്‍ തന്നെ!!